जळगाव । ब्लॉक ट्रेडिंगच्या माध्यमातून अल्पावधीत मोठा नफा मिळवून देण्याचे आमिष दाखवून चोपडा येथील एका निवृत्त प्राध्यापकाची तब्बल १५ लाख ५० हजार रुपयांची फसवणूक करण्यात आल्याची धक्कादायक घटना उघडकीस आली आहे. याप्रकरणी जळगाव सायबर पोलीस ठाण्यात अज्ञात सायबर भामट्यांविरुद्ध गुन्हा दाखल करण्यात आला आहे.
दीपक बन्सीलाल गुजराथी (रा. चोपडा) असे फसवणूक झालेल्या ६० वर्षीय निवृत्त प्राध्यापकाचे नाव आहे. ते अहिल्यानगर (अहमदनगर) जिल्ह्यातून प्राध्यापक म्हणून निवृत्त झाले आहेत.
पोलिसांनी दिलेल्या माहितीनुसार, २७ फेब्रुवारी रोजी प्राध्यापक दीपक गुजराथी यांना फेसबुकवर ‘ब्लॉक ट्रेडिंग’ संदर्भातील एक आकर्षक जाहिरात दिसली. अधिक नफा मिळण्याच्या आशेने त्यांनी जाहिरातीमधील फॉर्मवर आपली सर्व माहिती भरली. त्यानंतर ५ मार्च रोजी त्यांना सविता रमेश नावाच्या महिलेचा व्हिडिओ कॉल आला. तिने आपण नामांकित ‘एसबीआय सेक्युरिटीज बँक अँड ट्रेडिंग सिस्टीम’मधून बोलत असल्याचे सांगून त्यांचे कागदपत्रांचे व्हेरिफिकेशन केले आणि गुंतवणुकीसाठी एक लिंक पाठवली.
सुरुवातीला विश्वासासाठी गुजराथी यांनी १० हजार रुपये गुंतवले. त्यावर चांगला नफा दिसत असल्याचे भासवून सायबर भामट्यांनी त्यांना मोठी गुंतवणूक करण्यास सांगितले. “ब्लॉक ट्रेडिंगमध्ये गुंतवणूक करणाऱ्यांना कमीत कमी दोन आयपीओ (IPO) खरेदी करणे अनिवार्य आहे,” असा नियम सांगून भामट्यांनी गुजराथी यांना वारंवार वेगवेगळ्या खात्यांवर १५ लाख ५० हजार रुपये भरायला लावले. खात्यावर मोठा नफा दिसत असतानाही जेव्हा त्यांनी आपले शेअर्स विकून पैसे बँक खात्यात काढण्याचा प्रयत्न केला, तेव्हा पैसे निघत नसल्याचे त्यांच्या लक्षात आले. वारंवार विचारणा करूनही पैसे परत मिळत नसल्याने आपली फसवणूक झाल्याची खात्री पटताच त्यांनी सायबर पोलीस ठाण्यात धाव घेतली.
याप्रकरणी दीपक गुजराथी यांच्या फिर्यादीवरून अज्ञात सायबर गुन्हेगारांविरुद्ध गुन्हा दाखल करण्यात आला असून, पुढील तपास पोलीस निरीक्षक सतीश गोराडे करत आहेत.
Discussion about this post