नाशिक | नाशिकमध्ये भोंदू बाबा म्हणून ओळखल्या जाणाऱ्या अशोक खरात याच्या प्रकरणात मोठ्या घडामोडी घडत आहेत. महिलांवरील लैंगिक अत्याचार आणि फसवणुकीच्या गंभीर आरोपांमुळे अटकेत असलेल्या खरातला न्यायालयाने १४ दिवसांची न्यायालयीन कोठडी सुनावली आहे. त्यामुळे या प्रकरणाला नवे वळण मिळाले आहे.
दरम्यान, या प्रकरणात विशेष सरकारी वकील म्हणून नियुक्ती करण्यासाठी एसआयटीने अजय मिसर यांना लेखी विनंती केली होती. मात्र, इतर महत्त्वाच्या खटल्यांच्या कामाचा ताण असल्याचे कारण देत त्यांनी ही केस चालवण्यास असमर्थता दर्शवली आहे. त्यामुळे सरकारी वकिलांनी थेट नकार दिल्याने न्यायालयीन प्रक्रियेत नवे प्रश्न निर्माण झाले आहेत.
यानंतर सहाय्यक सरकारी वकील शैलेंद्र बागडे यांनी न्यायालयात युक्तिवाद केला. आता या प्रकरणात पुढे कोणत्या वकिलाची नियुक्ती केली जाणार, याकडे सर्वांचे लक्ष लागले आहे.
दरम्यान, एसआयटीकडून या प्रकरणाचा तपास वेगाने सुरू असून, खरातच्या कुटुंबीयांबाबतही कारवाई सुरू आहे. नाशिक पोलिसांनी त्याच्या मुलाला अटक केली असून, पत्नी फरार असल्याची माहिती समोर आली आहे. तसेच कुटुंबीयांच्या नावावर असलेल्या मालमत्तेबाबतही तपास सुरू असल्याचे सूत्रांनी सांगितले.
महिलांवरील अत्याचार, धमकावणे आणि जमीन बळकावल्याच्या आरोपांमुळे राज्यभरात खळबळ उडालेल्या या प्रकरणात पुढील काही दिवसांत आणखी महत्त्वाच्या घडामोडी घडण्याची शक्यता व्यक्त केली जात आहे.
Discussion about this post