मंत्री गुलाबराव पाटलांचा बालेकिल्लाच ढासळला; जळगाव ग्रामीणचे राजकारण वेगळ्या वळणावर !

जळगाव । जळगाव जिल्ह्यात झालेल्या नगरपरिषद नगरपंचायतीच्या निवडणुकीत दिगजांची प्रतिष्ठा ही पणाला लागली होती मात्र जिल्ह्यातील मंत्र्यांना मतदारांनी नाकारल्यामुळे आपल्याच बालेकिल्लात या दिग्गजांना पराभवाची धूळ चाखावी लागली आहे. यामध्ये मुक्ताईनगरमध्ये केंद्रीय राज्यमंत्री रक्षा खडसे, भुसावळ व वरणगाव नगर परिषदेत वस्त्रोद्योग मंत्री संजय सावकारे, धरणगाव नगरपरिषदेत पालकमंत्री व शिवसेना शिंदे गटाचे नेते गुलाबराव पाटील यांना आपल्या होम ग्राउंड वरच मोठा धक्का बसला आहे

मंत्री गुलाबराव पाटील यांच्यासाठी हा निकाल मोठा राजकीय धक्का मानला जात आहे. कारण त्यांच्या स्वतःच्या मतदारसंघातील धरणगाव नगर परिषदेत शिवसेना शिंदे गटाचा उमेदवार पराभूत झाला, त्यामुळे पाटलांचा बालेकिल्लाच ढासळल्याचं चित्र निर्माण झालं आहे.

धरणगाव हे गुलाबराव पाटलांचा बालेकिल्ला मानला जातो. त्यामुळे ही निवडणूक त्यांच्यासाठी अत्यंत प्रतिष्ठेची होती. धरणगाव नगर परिषद निवडणुकीत शिवसेना शिंदे गटाकडून वैशाली भावे यांना उमेदवारी देण्यात आली होती, तर शिवसेना ठाकरे गटाच्या शहर विकास आघाडीकडून लिलाबाई चौधरी मैदानात होत्या. ही लढत अत्यंत चुरशीची झाली. एकीकडे गुलाबराव पाटील यांची राजकीय प्रतिष्ठा पणाला लागली होती, तर दुसरीकडे शहर विकास आघाडीने त्यांचा गड हादरवण्यासाठी पूर्ण ताकद लावली होती.

गुलाबराव पाटील यांनी धरणगावमध्ये अनेक सभा घेत विरोधकांवर जोरदार टीका केली. मात्र, यावेळी त्यांचा राजकीय करिष्मा मतदारांवर प्रभाव टाकू शकला नाही. दुसरीकडे, लिलाबाई चौधरी यांनी अहिराणी भाषेत घेतलेल्या जोरदार सभेमुळे प्रचाराला वेगळी धार दिली. अखेर निवडणुकीत लिलाबाई चौधरी यांनी बाजी मारली. त्यामुळे मंत्री गुलाबराव पाटील यांनी आपल्या बालेकिल्ल्यातच मोठा धक्का बसलाय.

याआधी झालेल्या विधानसभा निवडणुकीतही धरणगाव शहरातून पालकमंत्री गुलाबराव पाटील यांना अपेक्षित मते मिळाली नव्हती. आताच्या या निकालानंतर धरणगाव शहरातील राजकीय समीकरणांमध्ये बदल होत असल्याची चर्चा सुरू झाली होती. याच पार्श्वभूमीवर झालेल्या नगराध्यक्षपदाच्या निवडणुकीत शिंदे गटाच्या उमेदवाराचा पराभव झाल्याने पालकमंत्र्यांसाठी तो मोठा राजकीय धक्का मानला जात आहे. धरणगावमधील हा निकाल केवळ नगर परिषद निवडणुकीपुरता मर्यादित न राहता, जळगाव ग्रामीणसह जिल्ह्यातील राजकीय समीकरणांवर प्रभाव टाकणारा ठरणार असल्याचे राजकीय जाणकारांचे मत आहे.