मुंबई । लाखो लाडक्या बहिणींना सरकारने मोठा झटका दिला आहे. खरंतर मुख्यमंत्री लाडकी बहीण योजनेमध्ये अपात्र महिलांनी लाभ घेतल्याची अनेक प्रकरणं समोर आली आहेत. त्यामुळेच प्रशासनाने सर्वेक्षण सुरु केलं आहे. सर्वेक्षणानंतर अपात्र लाडक्यांवर मोठी कारवाई केली आहे. मराठवाड्यात तब्बल दीड लाखांहून अधिक महिलांना या योजनेतून अपात्र ठरवण्यात आलं आहे. लाडकी बहीण योजनेसंदर्भातली आतापर्यंतची ही सर्वात मोठी कारवाई समजली जात आहे.
महाराष्ट्र सरकारची महत्त्वाकांक्षी योजना ‘मुख्यमंत्री लाडकी बहीण योजने’मुळे महिलांच्या जीवनात आर्थिक स्थैर्य निर्माण होईल अशी अपेक्षा होती. मात्र आता या योजनेतून अनेक महिलांना अपात्र ठरवण्यात आलं आहे. अनेक दिवसांपासून यासंदर्भात सातत्याने पडताळणी सुरू होती. त्यानंतर आता ही मोठी घडामोड समोर येत आहे.
योजनेतील अपात्र लाभार्थ्यांचा शोध घेण्यासाठी सरकारने संपूर्ण राज्यात सर्वेक्षण सुरू केलं. यासाठी तब्बल 6-7 लाख अंगणवाडी सेविकांना कामाला लावण्यात आलं. त्यांनी गावागावात, घराघरात जाऊन लाभार्थी महिलांची माहिती गोळा केली आणि लबाड लाडक्या बहीणींचा शोध घेवून त्यांना थेट अपात्र ठरवण्यात आलं आहे. बोगस माहिती देत लाडकी बहीण योजनेचे दरमहा 1500 रुपये घेणाऱ्या जिल्हा परिषदेतील महिला कर्मचाऱ्यांवर आता कारवाईची टांगती तलवार आहे. लाभार्थी महिलांची स्क्रुटीनी होत असून दररोज नव्याने बोगस लाभ घेणारे लाभार्थी समोर येत आहेत. काही दिवसांपूर्वी राज्यातील तब्बल 26 लाख लाभार्थी बोगस असल्याचे समोर आले होते. त्यामुळे आता येणारे पैसे अपात्र महिलांना वगळूनच मिळतील असा अंदाज आहे.
त्यामुळे या योजनेमध्ये भविष्यात आणखी काही मोठी कारवाई होते का हे पाहणे देखील महत्वाचे ठरणार आहे. प्रशासनाच्या या निर्णयामुळे अपात्र ठरलेल्या महिलांकडून मोठ्या प्रमाणात संताप व्यक्त केला जात आहे. नावे अचानक योजनेतून वगळण्यात आली, त्या सध्या महिला व बाल विकास कार्यालयांच्या उंबरठ्यावर हेलपाटे मारत आहेत. आम्हाला योजनेतून नाव वगळण्यात येणार आहे, याची कुठलीही पूर्वसूचना दिली नाही, असा आरोप अनेक महिलांनी केला आहे.
Discussion about this post