पाचोरा । चारित्र्याच्या संशयावरून पतीने झोपेत असलेल्या पत्नीवर धारदार शस्त्राने वार करून तिची निर्घृण हत्या केल्याची धक्कादायक घटना पाचोरा तालुक्यातील लोहारा येथे मध्यरात्रीच्या सुमारास घडलीय. नितीन शिंदे असे हत्या करणाऱ्या पतीचे नाव असून, घटनेनंतर त्याने स्वतः पोलीस ठाण्यात हजर होऊन गुन्ह्याची कबुली दिली. या घटनेने परिसरात एकच खळबळ उडाली आहे.
मिळालेल्या माहितीनुसार, पाचोरा रस्त्यावर राममंदिर समोर नितीन दौलत शिंदे (वय 35), अर्चना उर्फ कविता नितीन शिंदे(वय 32) हे मोलमजुरी करणारे दांपत्य राहायचे. मध्यरात्रीच्या सुमारास नितीन शिंदे याने पत्नी कविताची गाढ झोपेत असतानाच हत्या केली. या घटनेनंतर नितीन शिंदे स्वतःहून पोलीस स्टेशनला हजर झाला आणि त्याने गुन्ह्याची माहिती दिली.
पोलिसांच्या प्राथमिक चौकशीत धक्कादायक माहिती समोर आली आहे. नितीन शिंदे हा पत्नी कविताच्या चारित्र्यावर संशय घेऊन तिला वारंवार मारहाण करत होता, अशी माहिती आहे. याव्यतिरिक्त, घर बांधण्यासाठी माहेरून १० लाख रुपये आणण्यासाठी तो कविताकडे सतत तगादा लावत होता, असेही समोर आले आहे. याच कौटुंबिक कलहातून आणि संशयातून नितीनने कविताची हत्या केल्याचा पोलिसांना संशय आहे.
घटनेची माहिती मिळताच पोलिसांनी तात्काळ लोहारा येथील घटनास्थळी धाव घेतली. त्यांनी घटनास्थळाची बारकाईने पाहणी केली. अधिक तपासासाठी फॉरेन्सिक पथकालाही पाचारण करण्यात आले होते, ज्यांनी घटनास्थळाची सखोल तपासणी केली. यामुळे गुन्ह्याशी संबंधित महत्त्वाचे पुरावे गोळा करण्यास मदत मिळणार आहे. या प्रकरणी मयत विवाहिता कविताच्या भावाच्या फिर्यादीवरून पती नितीन शिंदे आणि सासूविरुद्ध गुन्हा दाखल करण्यात आला आहे. पोलीस या प्रकरणाचा सखोल तपास करत आहेत. पत्नीच्या चारित्र्यावर संशय घेणे आणि पैशासाठी छळ करणे, यातूनच ही हत्या झाली का, याचा पोलीस कसून शोध घेत आहेत.
Discussion about this post