जळगाव । पाणलोट क्षेत्रात झालेल्या जोरदार पावसामुळे हतनूर धरणाची जलपातळी वाढली. यामुळे यंदाच्या पावसाळ्यात पहिल्यांदा हतनूर धरणाचे २४ दरवाजे उघडण्याची वेळ आली आहे. मंगळवारी सकाळी ११ वाजता सुमारे एक लाख २० हजार ७४२ क्यूसेकने विसर्ग सुरू असताना, तापी काठावरील गावांना सतर्कतेचा इशारा पाटबंधारे विभागासह जिल्हा प्रशासनाने दिला.
हतनूर धरणाच्या पूर्णा व तापी नदीच्या पाणलोट क्षेत्रात झालेल्या पावसामुळे आवक वाढली. धरण पातळीत झालेल्या वाढीमुळे पूर व्यवस्थापनासाठी सोमवारी धरणातून विसर्ग वाढवण्यात आला. सोमवारी हतनूर धरणाचे सहा दरवाजे पूर्णपणे, तर १४ दरवाजे एक मीटरने उघडण्यात आले होते. ज्यामुळे तापीच्या पात्रात सुमारे ६४ हजार ७३२ क्यूसेकने विसर्ग सुरू होता.
त्यानंतरही पाण्याची आवक वाढताना दिसून आल्याने पाटबंधारे विभागाने आज मंगळवारी सकाळी हतनूर धरणाचे ४१ पैकी १६ दरवाजे पूर्ण क्षमतेने आणि आठ दरवाजे एक मीटरने उघडण्याचा निर्णय घेतला. परिणामी, तापी नदीच्या पात्रात सुमारे एक लाख २० हजार ७४२ क्यूसेकने विसर्ग सुरू झाला. पाण्याची आवक वाढल्यानंतर पुढील काही तासांत एक लाख २५ हजार ते दीड लाख क्यूसेकपर्यंत विसर्ग वाढवला जाऊ शकतो, असे पाटबंधारे विभागाच्या कार्यकारी अभियंत्यांनी सांगितले.
दरम्यान, हतनूर धरणाच्या पाणलोट क्षेत्रातील पर्जन्यमापन केंद्रांवर मंगळवारी सकाळपर्यंतच्या २४ तासात सुमारे ४२९ मिलीमीटर (सरासरी ४७.७ मिलीमीटर) पाऊस पडल्याची नोंद घेण्यात आली. पैकी बऱ्हाणपुरात २५.४, देढतलाईत ९२.६, टेक्सामध्ये १२४.४, एरडीत १४.२, गोपालखेड्यात ४९.४, चिखलदऱ्यात ११.८, लखपुरीत ५२.०, लोहाऱ्यात २९.२ आणि अकोल्यात ३०.२ मिलीमीटर पाऊस पडला.
हतनूर धरणातील विसर्ग वाढल्याच्या स्थितीत शेळगाव बॅरेजचेही १८ दरवाजे आता एक मीटरने उघडण्यात आले आहेत. ज्यामुळे तापी नदीच्या पात्रात ४१ हजार ६९२ क्यूसेकने विसर्ग होत आहे. तापी आणि पूर्णा नदीच्या काठांवर राहणाऱ्या गावातील नागरिकांनी नदीच्या पात्रात न जाणे, पोहणे, मासेमारी करणे तसेच जनावरांना पाणी पिण्यास घेऊन जाणे टाळावे. सुरक्षिततेच्या दृष्टीने सर्वांनी दक्षता बाळगावी, असे आवाहन जळगाव जिल्हा प्रशासनाकडून आवाहन करण्यात आले आहे.
Discussion about this post