नवी दिल्ली : लोकसभेच्या निकालाच्या दिवशी शेअर बाजारात मोठी पडझड झाली आहे. निवडणुकीच्या सुरुवातीच्या कलाचा परिणाम शेअर बाजारावरही पाहायला मिळत आहे. शेअर बाजारातील व्यवहार सुरु होताच सेन्सेक्स आणि निफ्टीत मोठी घसरण पाहायला मिळाली.
शेअर बाजारातील व्यवहाराला सुरुवात लाल चिन्हातून झाली आहे. शेअर बाजारात सेन्सेक्स २००० अंकांनी आपटला. तर निफ्टी ६०० अंकांनी घसरला आहे. शेअर बाजारातील पडझडीमुळे गुंतवणूकादारांना मोठा फटका बसल्याचे दिसत आहे. सोमवारी सेन्सेक्स आणि निफ्टी ऐतिहासिक उंची गाठली होती.
बँक निफ्टी सोमवारी पहिल्यांदा ५०००० अंकांनी पार गेला होता. त्यानंतर आज बँक निफ्टी २.१७ टक्क्यांनी घसरला. शनिवारी अदानी ग्रुपच्या शेअरमध्ये मोठी तेजी पाहायला मिळाली होती. आज अदानी ग्रुपच्या शेअरचा व्यवहार लाल चिन्हात सुरु आहे. अदानी पॉवरच्या शेअरमध्ये ८ टक्क्यांनी घसरण पाहायला मिळत आहे.
मुकेश अंबानी यांची रिलायन्स इंडस्ट्रीजचे शेअर देखील लाल चिन्हात व्यवहार सुरु आहे. रिलायन्स इंडस्ट्रीजच्या शेअरमध्ये ३.३७ टक्क्यांनी घसरण पाहायला मिळत आहे. रेल्वेच्या शेअरमध्येही घसरण पाहायला मिळत आहे. IRCTC, RVNL, IRFC च्या शेअरमध्ये घसरण दिसत आहे. एसबीआयच्या शेअरमध्येही घसरण दिसत आहे.
दरम्यान, लोकसभेच्या मतमोजणीच्या दिवशी गुंतवणूकदारांच्या संपत्तीमध्ये घसरण झाली आहे. काल बीएसईचे सर्व शेअरचे मार्केट कॅप 4,25,91,511.54 कोटी होते. त्यानंतर आज ४ जून रोजी मार्केट कॅप 4,15,59,174.70 कोटी रुपयांवर आली आहे. यामुळे गुंतवणूकदारांच्या भांडवलात 10,32,336.84 कोटी रुपयांची घसरण झाली आहे.
Discussion about this post