लोकसभा निवडणुकीच्या तोंडावर भाजप पक्षाला पश्चिम महाराष्ट्रात भलंमोठं खिंडार पडणार आहे. त्यामागची कारण म्हणजे भाजप नेते धैर्यशील मोहिते पाटील हे माढा लोकसभा मतदारसंघातून निवडणूक लढवण्यास इच्छुक आहेत. त्यांनी भाजपकडून उमेदवारांची यादी जाहीर होण्याआधीच आपल्या उमेदवारीचा दावा केला होता. पण भाजपने माढ्याचे विद्यमान खासदार रणजितसिंह नाईक निंबाळकर यांना उमेदवारी जाहीर केली.
त्यामुळे मोहिते पाटलांचा गट प्रचंड नाराज झाला. फक्त धैर्यशील मोहिते पाटील नाराज झाले नाहीत. तर राष्ट्रवादी अजित पवार गटाचे ज्येष्ठ नेते रामराजे निंबाळकर हे देखील नाराज झाले. त्यांनी तर उघडपणे रणजितसिंह नाईक निंबाळकर यांच्या उमेदवारीला विरोध केला. ते एवढ्यावरच थांबले नाहीत तर त्यांनी पक्षाला सोडचिठ्ठी देण्याची भाषा केली. भाजपकडून हा वाद शमवण्यासाठी प्रयत्नही करण्यात आले. भाजपचे संकटमोचक अशी ख्याती असलेले नेते मंत्री गिरीश महाजन यांनी हे वादळ शमवण्यासाठी प्रयत्न केले. पण वादळ शांत झालं नाही. याउलट या राजकीय वादळाचे वारे जोराने वाहू लागले.
दरम्यान, भाजपमध्ये अंतर्गत कलहाचा सर्वात मोठा फायदा राष्ट्रवादी काँग्रेसच्या शरद पवार गटाला होताना दिसतोय. कारण शरद पवार गटात भाजपच्या बड्या नेत्याचा प्रवेश होणार आहे. स्वत: शरद पवारांनी याबाबत प्रतिक्रिया दिली आहे. धैर्यशील मोहिते पाटील आणि रामराजे निंबाळकर यांच्या कुटुंबातील एका व्यक्तीला राष्ट्रवादी शरद पवार गटातून उमेदवारी दिली जाईल, अशी माहिती समोर आली होती. त्यानंतर आता धैर्यशील मोहिते पाटील यांचं नाव निश्चित झाल्याचीदेखील चर्चा आहे. विशेष म्हणजे याबाबतच्या आज अतिशय महत्त्वाच्या हालचाली घडल्या आहेत.
धैर्यशील मोहिते पाटील यांनी आज शरद पवार यांची प्रत्यक्ष भेट घेतली आहे. यावेळी दोन्ही नेत्यांमध्ये अर्ध्या तासापेक्षा जास्त वेळ चर्चा झाली. या बैठकीनंतर धैर्यशील मोहिते पाटील यांनी वेट अँण्ड वॉच अशी प्रतिक्रिया दिली. तर शरद पवार यांनी यानंतर घेतलेल्या पत्रकार परिषदेत धैर्यशील मोहिते पाटील यांच्या पक्षप्रवेशाची बातमीच देवून टाकली.
Discussion about this post