लोकसभेच्या तोंडावर उद्धव ठाकरेंच्या आणखी एका आमदाराने सोडली साथ ; आज करणार शिंदे गटात प्रवेश

नंदुरबार । एकीकडे लोकसभेची रणधुमाळी सुरू असतानाच शिवसेना उद्धव ठाकरेंच्या आणखी एका आमदाराने साथ सोडली आहे. शिवसेनेचे विधान परिषद सदस्य आमश्या पाडवी आज सायंकाळी शिवसेनेत प्रवेश (शिंदे गट) प्रवेश करणार आहेत

नंदुरबार जिल्ह्यातील आदिवासी चेहरा म्हणून ओळख असलेल्या आणि शिवसेना उद्धव बाळासाहेब ठाकरे गटातील विधान परिषदेचे आमदार आमश्या पाडवी हे आपल्या शेकडो कार्यकर्त्यांसोबत आज मुंबई येथे मुख्यमंत्री एकनाथ शिंदे यांच्या उपस्थितीत शिवसेना शिंदे गटात प्रवेश करत आहेत. लोकसभेच्या तोंडावर ठाकरेंसाठी हा मोठा धक्का मानला जात आहे.

दरम्यानं आगामी लोकसभा निवडणुकीच्या पार्श्वभूमीवर नंदुरबार या काँग्रेसच्या पारंपरिक मतदारसंघातून आमदार पाडवी यांना उमेदवारी हवी होती. महाविकास आघाडीच्या जागा वाटपात हा मतदारसंघ काँग्रेसचा आहे. येथून माजी मंत्री के.सी.पाडवी उमेदवार आहेत. या पार्श्वभूमीवर शिवसेना ठाकरे गटाचे पाडवी यांनी केलेली मागणी मान्य होण्यासारखी नव्हती.

आज सकाळी अक्कलकुवा येथून ७० गाड्या आणि कार्यकर्त्यांसह आमदार पाडवी मुंबईला रवाना झाले आहेत. त्यांच्यासमवेत प्रामुख्याने अक्कलकुवा भागातील पदाधिकारी होते. नंदुरबार या आदिवासी भागातील एक सामान्य आदिवासी कार्यकर्ता असलेल्या पाडवी यांना ठाकरे गटाकडून विधान परिषदेवर नियुक्ती करण्यात आली होती. त्यांनी आज शिंदे गटात प्रवेश केल्याने ठाकरे गटाला मोठा धक्का बसला आहे.