जळगाव : सध्या जळगावात आत्महत्याचे प्रमाण मोठ्या प्रमाणात वाढताना दिसत आहे. यात किशोरवयीन मुला मुलींची संख्या देखील वाढत आहे. अशातच आता एक धक्कादायक प्रकार समोर आला आहे.
मोबाइल खेळत असताना आईने तिच्याजवळील मोबाइल घेत अभ्यास करण्यास सांगितले. याचा राग आल्याने सहावीच्या वर्गात शिकणाऱ्या 12 वर्षीय मुलीने दुसऱ्या मजल्यावरील खोलीतील झोक्याच्या कडीला ओढणीच्या साहाय्याने गळफास घेत आत्महत्या केली.
ही घटना जळगावातील रामानंद नगरातील नंदनवन कॉलनीत उघडकीस आली आहे. पद्मश्री ऊर्फ परी भरत पाटील असे मृत मुलीचे नाव आहे. याप्रकरणी रामानंदनगर पोलिस ठाण्यात अकस्मात मृत्यूची नोंद झाली आहे. शिक्षक भरत पाटील यांची ते कन्या होती.
रागाच्या भरात गेलेली पद्मश्री बराच वेळ झाला तरी खाली न आल्याने कुटुंबीय खोलीकडे गेले. दरवाजा ठोठावूनदेखील मुलगी प्रतिसाद देत नसल्याने त्यांनी दरवाजा तोडला. त्यावेळी मुलगी गळफास घेतलेल्या अवस्थेत बघताच तिच्या कुटुंबीयांना धक्का बसला. कुटुंबीयांनी मुलीला शासकीय वैद्यकीय महाविद्यालय व रुग्णालयात दाखल असता त्याठिकाणी तिला मयत घोषित केले. दरम्यान, पदद्मश्री ही इयत्ता सहावीच्या वर्गात शिक्षण घेत होती. ती अभ्यासातदेखील हुशार होती.
Discussion about this post